Qar

 Cavidan

Bu qar niyə yağır axı?

Tutub yolu, bərəni,

Segah üstə,

Ağlar-ağlar,

Muğam kimi yağır bu qar…

Dəli qardaş kimidir,

Xain ər kimi…

Ürəyimi donduracaq az qala

Bu qar

Niyə yağır belə?

Bir addımlıq ümidimi,

Bir nəfəslik arzumu

Ağ ölüm tək boğur…

Kimsənin anlamadığı

Mentalitet kimidir,

Hamının dilindən yağır,

Hamının başına tökülür…

Ağsaqqal qar,

Ağbirçək qar…

Böyüklərə ağ olan

Gözlərim qədər ağ qar…

Istəmirəm!!!

Nə şaxta babayla,

Nə qar qızla aldatmayın başımı!

Artıq

Şaxta babanın

Pedifil qoca,

Qar qızın

Gerontofil fahişəcik oluğunu

Anlayacaq qədər böyümüşəm…

Küçələrdə maşın yox,

Dərsə gedən uşaqlar

Yıxıla-dura söyürlər:

- Az qalıb ömrün sənin…!

Mənim

Nə qədər ömrüm qalıb görəsən?

On ilmi?

Otuz ilmi?

Hamısı da

Qar içində keçəcək…

Bəlkə də əriyəcəm

Elə gələn yayadək-

Elə qar tək…

Bu qar

Niyə yağır axı?..

Lap darıxdım…

Durum

Qara bulaşım.

Qar adamı olum

Bapbalaca bəbələr

Sevinib oynasınlar ətrafımda…

Lənət şeytana!

Bu qardan

Bir xeyir

Gəlməlidir, ya yox…

2006