MƏN NƏ ADAM, NƏ İNSANAM
Mən nə adam, nə insanam... Tez-tez sual verir dost-tanışım: – Bəs, sən nəsən?!
Mən adamlar, insanlar içində gəzən bir ruham.
Qaçırılan Qarabağ adlı bir gəlinin fəryad səsi, onun şəhid ərinin yaralanmış qəlbiyəm mən.
Həmin şəhid ərin anasının gözlərindən axan yaş, dilindəki ağıyam mən.
Mən nə adam, nə insanam... Mən yolam... Dilsiz, ağızsız, dərdli yol...
Qoca şəhərdə üzərində düşməni də dost tək gəzən yol...
Göydələnlər şəhərində gizlənən Qız Qalasının qədim divarlarında ağlayan göz yaşıyam. Mavi Xəzərin hirslənəndə dalğası, sakit vaxtı həzin səsiyəm mən.
Mən nə adam, nə insanam... Mən küləyəm, dəli külək...
Yoldan ötən gözəl qızın uzun qara saçlarını dağıdıb, içində dəli ehtiras oyadan külək...
Mən nə adam, nə insanam...
Mən nə adam, nə insanam...
Mən payızın yağış oğlu, mən payızın kötük ağac atasının əzabla xışıldayan, lakin səsinə səs verilməyən, sarı yarpaq qızının fəryad səsiyəm.
Hər qış yolların günahını donduran qaram... bəyaz qar, qırmızı qar...
Mən nə adam, nə insanam... Səhərləri doğan Günəş, gecələri işıqlandıran Ayam mən.
Min-min ulduz içində yetim qalan dan ulduzuyam...
Mən nə adam, nə insanam... Mən daşam. Vətənində yadlaşan, vətən daşı, qaya daşı, çınqıl daşı...
Birinə sinə, o birinə isə baş daşıyam. Üzərində erməni bayrağını saxlayan Şuşanın qala daşlarının göz yaşıyam.
Mən nə adam, nə insanam...
Doğma vətənimdə insanların ögey baxdığı, ordan-ora, burdan-bura daş atıb, qovduğu, daha sonra barmaqlıqlar arasında həbs etdiyi Bozqurdam...
Boğazına zəncir salınan köpəyəm. Qorxur məndən cavan da, qoca da...
Nədi, nədi buraxanda üzü Qarabağa sarı qaçan köpək qurduyam...
MƏN DAHİYƏM
Mən dahiyəm!.. İşsizi olmayan məmləkətin işsizlərinin dahisiyəm!
Məmurunun cibindən neft qoxusu gələn, vətəndaşı neftə möhtac ölkədə neftsizlərin dahisiyəm!
Mən dahiyəm! İstedadlı yazarlar içində istedadsızların, qələmlilər içrə qələmsizlərin dahisiyəm!..
Çöllər mənim tək məkanım. Mən çöllərin dahisiyəm!
Yerim yox oturmağa, evim yox yaşamağa, yurdum yox ölməyə, mən yurdsuzlar dahisiyəm!
Bir gün qəfil ölsəm, cəsədimi dəfn etməyib, çöplüyə atın siz... Mən çöplükdə bir parça çörək axtaran dilənçilər dahisiyəm!
Mən dahiyəm! Kim deyər ki, sən dahi deyilsən?!
QATİL
Qatil! Bu adı qazananlar çoxdur: dost qatili, ata-ana, qardaş-bacı qatili...
Bunlar hamısı məhkəmə qarşısına çıxan qatillərdir.
Fəqət, yeganə qatil var ki, onu hakim cəzalandırmaz. Bu da sənsən!.. Sən, ruh qatili...
Sən ruhumun qatilisən! Sən sevgimin qatilisən! Sən duyğularımın, xəyallarımın qatilisən.
Sən qatilsən! Sən ilk görüşdə həyəcandan titrəyən əllərin, gözlərinə utanıb baxa bilməyən gözlərin qatilisən!
Sən qatilsən, dəniz kənarındakı görüşümüzdə daş atıb, hürkütdüyün qağayıların qatilisən! Sən qatilsən...
Üzərində sevərək gəzdiyimiz, evinizə gedən yolun qatilisən! Qorxma, nədən qorxursan?!
Bu sadəcə mənim səsim, bu sadəcə mənim səndən şikayətimdir. Baxan yoxdu amma bu şikayətə...
Keçmişimin qatilisən sən!.. Keçmişimin qatili!..
Комментариев нет:
Отправить комментарий