Əmanətçilərə bəd xəbər: Ehtiyatlı olun!

"Əmanətlərin Sığortalanması Fondu əmanətlərin qaytarılmasına tam təminat deyil. Çünki bu fond dövlət qurumu deyil". Bu sözləri qaynarinfo.az-a bank üzrə ekspert Əkrəm Həsənov fəaliyyətdə olan və bağlanan bankdakı əmanətlərin təhlükəsizliyi haqqında şərh verərəkən deyib.
Əkrəm Həsənovun sözlərinə görə, əmanətlərin sığortalanması haqqında qanunda müddəa var ki, dövlət Əmanətlərin Sığortalanması Fondunun öhdəlikləri üçün cavabdeh deyil: "Yəni sabah fond pulu qaytara bilməsə, dövlətin heç bir məsuliyyəti yoxdur. Bu ilin fevralında və indiki vəziyyətdə biz gördük ki, fondda pul yoxdur. Fond sadəcə Mərkəzi Bankdan kredit götürür. Qaytarılan əmanətlər kreditlərin hesabınadır. Bu da sonsuz ola bilməz. Fondun öz pulu yoxdursa, Mərkəzi Bank da hər zaman kredit verməyəcək. Bu baxımdan əmanətçilər başa düşməlidir ki, tam sığortalanma yoxdur. Fond pulu qaytara bilməsə, sadəcə onu bağlayacaqlar". 
Ekspert bildirib ki, bu günə qədər əmanətlərdə elə böyük problem yoxdur: "Çünki bağlanan banklar elə də böyük banklar deyil. Məsələn, böyük bir bank da bağlanmalı idi. Ancaq orda 600 milyon manat əmanət olduğundan bağlamadılar. Bildilər ki, bu əmanəti qaytara bilməyəcəklər. Əmanətlərin Sığortalanması Fondu pulu verə bilməsə, fondun özünü bağlayacaqlar. Banklar da bu gün əmaənətləri qaytarmaq gücündə deyil. Əslində heç qaytarmır. Xırda hissələrlə vz qeyri-müəyyən qaydada qaytarılır. Müştəri var ki, əmanətinin vaxtı apreldə bitib. Ona deyiblər ki, sənin pulunu il yarımdan sonra veriləcək. Əlbətdə ki, belə hallar digər banklarda əmanət saxlayan əmanətçilər üçün təhlükəlidir. Əmanətçilərin Sığortası Fondu bağlanmasa belə, o fond tərəfindən pulun verilməsi üçün bankı bağlamaq lazımdır. Dövlət hər dəfə bunu etmir. Digər tərəfdən bağlanan banklarda konpensasiya edilən əmanətlərlə bağlı da əyintilər var. Qaytarma prosesində dollarla olan əmanətləri milli valyuta, Mərkəzi Bankın kursu ilə qaytarırlar. Bu da müştəriləri qane etmir. Mərkəzi Bankın kursu 1.62 manatdır, amma bazarda ən azı 1.67-dir". 
Əkrəm Həsənov qeyd edib ki, əmanətçilər Əmanətlərin Sığortalanması Fondunun istənilən halda bütün əmanətlərə təminat vermədiyini bilməlidir: "Xarici valyuta ilə müqavilə 3 faizə qədərdisə, bu əmanətlər sığortalanıb. Ondan çoxdursa, sığortlanmıyıb. Ümumiyyətlə əmanətçilər çox ehtiyatlı olmalıdırlar".