Aliyə Əsədova - Sərhəd sular

Hələ uşaqkən

üzməyi öyrəndin

"dənizi sevirəm"- deyə-deyə,

sahillərdə böyüdün

sahillərdə böyütdün bəslədiyin arzuları.

Keşik çəkməyi öyrəndin dənizlərdə,

vaxtsız-vədəsiz dolandın

qarmaşıq sularında  dənizin,

sahilləri böyütdün arzularınla,

o böyüdükcə sən də böyüdün

fırtınalı,  təlatümlü dalğalarda.

Arzuların böyüdü

gəzdin dolaşdın

analdın ki dünya  böyükdü,

bu böyüklükdə dənizləri qova-qova

yaşamağı öyrəndin

dənizlə verib baş-başa

bu qarmaşıq sularla

sirdaş olmağı öyrəndin,

gözlərini qırpmadın

qapamadın sanki.

Təyyarələr oyadır yuxulu sabahları,

Sən oyaqsan,

izləməkdən yorulmadın

hələ də qoruyursan

gah qorxulu, fırtınalı

gah da sakit dənizləri.

Heç qorxmadın

sular səni aparar deyə,

dənizə oxşamadın

dəniz səni aparar deyə,

soruşanda sahilinə, göylərinə belə dedin-

"suların sərhəddi var".