Hafiz Mirzə: “Farmazon deyiləm”

Yazıçı-publisist Hafiz Mirzə ilə müsahibə

- Özünüzü 2 sözlə təqdim edin.
- Yazıçı-publisist.

- Sizi necə təqdim edəndə razı qalırsınız?
-Hacı.

“Mən kiməm?” sualına necə cavab verirsiniz?
-Allahın bəndəsi.

- Dost…
-İnsanların eşqsiz və qohumluq əlaqələri olmadan, amma ünsiyyətdən, onun üçün nəsə etməkdən və ona çox şeyi etibar eləməkdən məmnun qaldıqları tərəfdaşı.

- İlk sevginiz?
-Ağlatma görək! Heç unutmadım ki! Dünən qədər yaxın.

- Əsas ixtisasınız?
-Mədəni-maarif işçisi, klub işinin təşkilatçı metodisti.

- İstifadə etdiyiniz nəqliyyat növü?
-“Moskviç-2141”.

- Sevdiyiniz maşın markası?
- BMW.

- Sevdiyiniz brend?
-“Pier Karden”.

- Sevdiyiniz saç düzümü?
- Farmazon deyiləm.

- Sevdiyiniz rəng?
- Yaşıl.

- Ən çox bəyəndiyiniz ölkə və şəhər?
-Türkiyə,.. gözəlim Lənkəran!

- Sevdiyiniz yemək?
- Milli mətbəximizdə sevmədiyim yemək yoxdur ki! Ləvəngili cücə-kabab, can ətinin döymə kababı, çığırtma-plov, turşkabab-plov…

- Ən çox istifadə etdiyiniz söz?
- İnşallah!

- Leksikologiyanıza yad olan söz?- Müasir alınma türk və ingilis sözləri.

- Sizi nə həyacanlandıra bilər?
-İlahi hikmətlərin nədəsə təcəlləsi və gözəllik!

- Ən çox sevdiyiniz kitab?
-Qurani-Kərim!

- Ən çox sevdiyiniz yazar?
- Orxan Kamal.

- Ən çox bəyəndiyiniz ifaçı?
-Alim Qasımov!

- Ən çox bəyəndiyiniz musiqi janrı?
- Muğam.

- Özünüzdə qeyri adi istedad hiss edirsizmi?
- Etiraf etsəm qeyri-təvazökarlıq olacaq, etməsəm yalan.

- Mənfi xüsusiyyətiniz?
- Sadəlik.

- İdeal insan necə olmalıdır?
-İdeal insan 14 məsum kimi olmalıdır.

- Özünüzü ideal insan hesab edirsizmi?
-Təəssüf ki, müasir həyatın sərt reallıqları qarşısında 15-ci məsum olmaq mümkün deyil.

- Sizi özünüzdən nə çıxarda bilər?
- Ağ yalan, iftira və həyasızlıq!

- Həyat fəlsəfənizi ifadə edin?
- Müdrikliyə doğru uzun və çətin bir yolun yolçusu olmaq.

- Siz xoşbəxtsinizmi?
- Adi vəziyyətdə və hələ nəyisə itirmədən əslində çoxları xoşbəxtdir.

- Bədbəxtliyin xüsusi düsturu varmı?
-Bu insanın öz düşüncəsinin məhsuludur. Dərinə getdikdə nə xoşbəxtlik var, nə də bədbəxtlik.

- Hər şeyin sonu üçün əvvəlinə münasibətiniz necə olur?
- Mən böyük həcmli “Son və başlanğıc” romanının müəllifiyəm.

- Ölüm niyə ölmür?
- Əslində ölüm anlayışı bir məkanda bitib, başqa bir məkana keçidi ifadə edir.

- Dinlərə münasibətiniz?
- Mömin müsəlmanam, hacıyam!

- Kimdən və nədən xilas olmaq istərdiniz?
-Məkri zənəndən və pulsuzluqdan.

- Falçıya inanırsızmı?
-Peşəkarlara və qismən.

- Daş olmaq yaxşıdır yoxsa daşlaşmaq?
- Baş yarmaq, ayağa ilişmək və arxasıyca atıldıqda bədlik gətirmək xüsusiyyətlərinə görə daş olmaq pisdir, bütpərəstlik sayılacağı üçün isə daşlaşıb abidəyə çevrilmək arzuedilən deyil.

- Sevinciniz nə qədərdi?
- Bir anlıq.

- İnsanların hansı xüsusiyyətlərinə dəyər verirsiniz?
- İmanına və istedadına.

- Bağlayıcılardan çoxmu istifadə edirsiniz?
- “Və”,” ilə”,” vergül” mənim yaxın dostumdur.

- Çayı içmək ürəyinizcədir, yoxsa keçmək?
- Bir lənkəranlı kimi müsibət çayxoram!

- Gülməyi xoşlayırsız, yoxsa güldürməyi?
- Hər ikisini.

- Mənə sualınız?
- Dünyanın sonu çatarsa, son dəqiqələrdə sən hansı işləri görərdin?

- Anamın əllərindən öpərdim.

Tural Balabəyli                               merkez.az