Şagird Nailiyyətlərinin Qiymətləndirilməsi (Programme for İnternational Student Assessment - PİSA) adlanan bu proqram 2000-ci ildən tətbiq olunur və 3 ildən bir keçirilir. Sonuncu test 2006-cı ildə keçirilmiş və 57 ölkənin 400 min 15 yaşlı şagirdini əhatə etmişdi.
PİSA riyaziyyat, təbiət fənləri və oxuyub-qavrama üzrə bilikləri yoxlayır. 2009-cu ilin nəticələrinə görə, Azərbaycanın 15 yaşlı şagirdləri riyaziyyatdan 373 bal (2006-cı ildə 382 bal), təbiət elmlərindən 431 bal (2006-cı ildə 476 bal), oxuyub-qavramadan isə 353 (2006-cı ildə 362 bal) toplaya bilib. Bu, Qırğızıstan istisna olmaqla iştirakçı ölkələr sırasında ən pis nəticədir. Keçmiş SSRİ ölkələrindən, əhalisi bizdən 6 dəfə az olan Estoniya isə həmin yarışmada 12-ci nəticə göstərib.
Qısa şərh: Göründüyü kimi, bu, respublika üzrə göstəricidir. Görəsən, ölkədə təhsil sahəsində biabırçı nəticə göstərən, bu ilki buraxılış imtahanlarının nəticələrinə görə ölkə üzrə sonuncu yer tutan Masallı rayonunda nəticələr necə olar? Məhz ölkə təhsilini belə rayonlar geri çəkmirmi? Görəsən, rayon rəhbərliyi bu biabırçılıqdan nəticə çıxartdımı? Gözləmək olardı ki, icra hakimiyyəti yanındakı şurada, müəllimlər konfransında və digər rayon miqyaslı tədbirlərdə bu, təhsil biabırçılığı kəskinliyi ilə müzakirə olunacaq, təhsili alverə, bazara çevirənlər layiqincə cəzalanacaq, Lakin olmadı. Hamı ağzına su alıb susdu. Bir kənddə balaca bir bulaq tikiləndə, onun açılışında yan-yana sıralanan rəhbərlər bu dəfə cınqırlarını çıxartmadılar. Halbuki, məlumat təhsil naziri səviyyəsində televiziyada səslənmişdi. Masallının icra başçısı Qəzənfər Ağayev də bu biabırçılığı dilinə gətirmədi. Belə zir-zibilləri ört-basdır etməklə onları “sağaltmaq” olarmı? Bolşeviksayağı “arzuolunmaz” təhsil ocaqlarında yoxlamalar aparıb, bəzi saxtakarların əməllərinə göz yummaqla belə biabırçılıqları aradan qaldırmaq mümkündürmü? Nə qədər ki, Masallı təhsilinin “təkərləri” birinin əlində, “sükanı” başqalarının əlində olacaq, rayonun rəhbəri gənclərin tərbiyəsindən daha çox o kəndin, bu kəndin on hektarlarla torpaqlarını, su hövzələrini çırpışdırmala məşğul olacaq, yəqin ki, bundan da betər nəticələrin şahidi olacağıq.
Qeyd: Məlumat üçün bildirək ki, bir neçə aydır Lənkəran və Yardımlı rayonlarında təhsil şöbə müdirlərinin boş qalmış yerinə kadr tapılmır. Görəsən, kadr yoxdur, ya “kim yuxarı” məsələsəini həll edə bilmirlər?
Sonda onu da xatırladaq ki, dünyanın rüşvət reytinqində Azərbaycan 47, Gürcüstan isə 3 faizlə dəyərləndirilib.
Korrupsiya üzrə beynəlxalq monitorinq aparan “Transparency İnternational” təşkilatının araşdırmalarına görə, hər il Yer kürəsi sakinlərinin dörddə biri rüşvət verməli olur. “Media forum” saytının məlumatına görə, araşdırmada keçmiş sovet respublikaları əhalisinin 32%-nin rüşvət verdiyi qeyd olunur. Bu ölkələr arasında ən az rüşvət halı Gürcüstandadır - sorğuya qatılanların yalnız 3%-i rüşvət verdiyini deyib. Ermənistan əhalisinin 22%-nin rüşvət verdiyi açıqlanıb. Türkiyədə əhalinin 19%-nin rüşvət verdiyi iddia olunur. Belarusun göstəricisi 27%, Ukraynanınkı 34%, Moldovanınkı 37%-dir. Monitorinqin göstəricilərinə görə, Azərbaycan əhalisinin 47%-i rüşvət verir.
Комментариев нет:
Отправить комментарий