GƏL BİR OYUN OYNAYAQ

Günay Ümid

Gəl bir oyun oynayaq

Mən sayım, sən gizlən

Axtarım səni.

Mən axtarmağa öyrəşmişəm balaca.

Amma qaranlıqda gizlənmə

Qaranlığın gözləri baxdıqca

Kölgə salar taleyinə.

Ömrüm boyu axtarmışam!

Axtarmışam  insanlarda insanlığı,

Gündüzlərin işığını,

Ümidin yalın ayağına düşməyə,

Mən günəşin istisində  üşüməyə

Öyrəşmişəm balaca…

Gəl bir oyun oynayaq

Mən qaçım, sən qov!

Addım-addım,

Sürüm-sürüm

Öz içimdə ovulmağa öyrəşmişəm.

Bu günümdən sabahıma qovulmağa

Öyrəşmişəm balaca…

Gəl bir oyun oynayaq.

Yeddi şüşə.

Çəmbərdən çıxan şüşə

Sənin olsun balaca.

Çərçivəmdən çıxmamağa öyrəşmişəm.

Qırılmışam.

Çiliklərim içimdəki çəmbərimi kəsə bilmir,

Yorulmuşam balaca…

Gəl bir oyun oynayaq

Ovuclarımda gizlədim

Son arzumu.

“Ya bundadı, ya bunda”

Deyərək axtar balaca.

və tap,

Ovuclarımın içində sıxışan diləyimi..

Körpə əllərinlə azad elə sən balaca.

Getməliyəm balaca!

Əslində getməkdən də qorxuram…

Belə möhkəm görsənməyimə  baxma

İnanma  qürurumun yalançı mətinliyinə,

Getməliyəm !

Əslində getməkdəndə qorxuram

Əməl dəftərimə yazılan

Oyunların çətinliyinə

Qorxuram balaca…

Daha oynamaq istəmirəm,

Susdum!

Susdum balaca.

Daha oynamaq istəmirəm

Mən uduzdum balaca.