Getməyin soyadı

Sayman Aruz

Getməyin soyadı ölməkdi gülüm

Özünü min yerə bölməkdi gülüm.

Dodağım qəmli sükutla doludur

Həyatım bir balaca qorxuludur.

Tullayıb sevgi məni çantalara

Getm‎əyim var məni mindir qatara.

Kiçiyəm mən kədərimdən azacıq

Böyüyəm mən otağımdan balacıq.

Titrədin kabusunuzdan oyanım!

Yatdığım namusunuzdan oyanım!

-Məndə sığmaz bu cahan, bu “həşərat”

Çəkin məndən eşiyə ay hazarat!-

Pəmbei daği cünun içrə nəhan-

dır filan-ibni, filan-ibni, filan!

Ey şərəfdən danışan kor insan,

qayışın açıq qalıb, bağlagınan!

Bu şeir bir nəsilin hikkəsidir

Üsyanın, bir də sükutun səsidir!

Hönkür-hönkür uluyur hər gecə mən!

Qapı mən, qapıdaki mən, pəncərə mən!

Ürəyimdə bulanır hadisələr

Molla da, ziyalı da ölsə əgər...

Sil məni, saxla məni xatirəlik.

Nümrəmi unudgunan bir dəfəlik.

Yorqunam bir uşaqın hissi kimi

Toprağa bir uçağın hissi kimi...

Arzu et arzularından doğulum

Gözləyir püfləməyi zəncirotum...

Uzaqdan bir səs deyir: gəl yanıma!

Yeriyir ayaqlarım, çatmır ama...

  .......  .........  ........