"Son iki ildə vulqar söz işlətdiyim yadıma gəlmir"

Ramil Əhməd “TEZ-BAZAR”da

- Özünüzü 2 sözlə təqdim edin.

- Ramil Əhməd.

- Sizi necə təqdim edəndə razı qalırsınız?

- Səmimi insan, yaxşı dost.

- “Mən kiməm?” sualına necə cavab verirsiniz?

- Gənc yazar.

- Dost…

- Dostlarım var, amma azdır.

- İlk sevginiz?

- İlk sevgini bu yaxınlarda duymuşam.İstəyirəm bu ilk və son olsun.

- Əsas ixtisasınız?

- Filoloq.

- İstifadə etdiyiniz nəqliyyat növü?

- Metro və avtobus.

- Sevdiyiniz maşın markası?

- Yoxdur. İstənilən maşında(bu avtobus da ola bilər)pəncərədən ətrafı seyr etməyi sevirəm.

- Sevdiyiniz brend?

- Ədəbiyyat.

- Sevdiyiniz saç düzümü?

- Fərqi yoxdur. Nadir hallarda güzgü qarşısına keçib, saçımı darayıram. Həmişə harasa tələsirəm…

- Sevdiyiniz rəng?

- Göyqurşağının bütün rənglərini.

- Ən çox bəyəndiyiniz ölkə və şəhər?

- Türkiyə , İstanbul.

- Sevdiyiniz yemək?

- Yeməklərə qarşı kaprizim yoxdur.

- Ən çox istifadə etdiyiniz söz?

- Yaxşı.

- Leksikologiyanıza yad olan söz?

- Vulqar sözlər. Son iki ildə vulqar söz işlətdiyim yadıma gəlmir.

- Sizi nə həyacanlandıra bilər?

- Mənə aid olan hər şey.

- Ən çox sevdiyiniz kitab?

- Çoxdur.

- Ən çox sevdiyiniz yazar?

- Sevdiyim yazar yoxdu, sevdiyim əsərlər var.

- Ən çox bəyəndiyiniz ifaçı?

- Ahmet Kaya, Teymur Əmrah.

- Ən çox bəyəndiyiniz musiqi janrı?

- Ovqatımdan asılı olaraq dəyişir. Daha çox sakit mahnıları dinləyirəm. Kamança və piano səsləri mənə çox doğmadı.

- Özünüzdə qeyri- adi istedad hiss edirsizmi?

- Məndə qeyri-adi heç nə yoxdu.

- Mənfi xüsusiyyətiniz?

- Hamıya tez inanıram.

- İdeal insan necə olmalıdır?

- İdeal şeylər yalnız filmlərdə və romanlarda olur. Amma hesab edirəm ki, anam və sevdiyim xanım ideala çox yaxındılar...

- Özünüzü ideal insan hesab edirsizmi?

- Yox.

- Sizi özünüzdən nə çıxarda bilər?

- Ədalətsizlik, qeyri-səmimilik, qadınların kişilərə, kişilərin qadınlara xas hərəkətlər etməsi.

- Həyat fəlsəfənizi ifadə edin?

- İnsanları sevmək lazımdır, qarşılıqsız olsa belə….

- Siz xoşbəxtsinizmi?

- Daimi xoşbəxtlik yoxdur. Xoşbəxt anlar var.

- Bədbəxtliyin xüsusi düsturu varmı?

- Bəlkə də var, mən bilmirəm.

- Hər şeyin sonu üçün əvvəlinə münasibətiniz necə olur?

- Mən riskə getməyi bacarıram.

- Ölüm niyə ölmür?

- Bunu ölümün özündən soruşun.

- Dinlərə münasibətiniz?

- Normal.

- Kimdən və nədən xilas olmaq istərdiniz?

- Qorxaq və yaltaq adamlardan.

- Falçıya inanırsızmı?

- Fırıldaqçı adamlar məndə ikrah hissi doğurur.

- Daş olmaq yaxşıdır, yoxsa daşlaşmaq?

- Heç biri xarakterimə uyğun deyil.

- Sevinciniz nə qədərdir?

- Xırda şeylərlə başımı qatıram…

- İnsanların hansı xüsusiyyətlərinə dəyər verirsiniz?

- Yaxşı olan bütün xüsusiyyətlərinə.

- Bağlayıcılardan çoxmu istifadə edirsiniz?

- Aydınlaşdırma, güzəşt və şərt bağlayıcılarından hə.

- Çayı içmək ürəyinizcədir, yoxsa keçmək?

- Yazı yazarkən çay içməyi xoşlayıram, yayda kəndə gedəndə dostlarımla çayda və ya kanalda üzməkdən yaxşı nə ola bilər?!

- Gülməyi xoşlayırsız, yoxsa güldürməyi…

- Ətrafımdakı insanların həmişə gülməsini istəyirəm, mən gülməsəm də olar.

- Mənə sualınız.

- Sən heç bilirsən ki, çay necə axır?

Tural Balabəyli