Yaşamaq günahdır bu məmləkətdə

Abbasağa Azərtürk

Təşviş içindəyik hər səhər-axşam 

Bu gündən sabaha qalmayıb inam. 

O qədər itib ki, nizam-intizam, 

Doğru tək sırınır çılpaq qələt də

Yaşamaq günahdır bu məmləkətdə!

Olmuşuq vətəndə biz əsir-yesir

Nə həsir qalıbdır, nə Məmmədnəsir.

Nazir adam döyür, polis cib kəsir!

Harınlar işvətdə, biz əziyyətdə

Yaşamaq günahdır bu məmləkətdə!

Özləri bəs qədər yeyib doyurlar,

Bu xalqı quruca yerdə qoyurlar. 

Kimi istəsələr tutub soyurlar 

Küçədə, bazarda, evdə, həyətdə

Yaşamaq günahdır bu məmləkətdə!

İndi dükan-bazar baqqallarındır,

Leş-lavaş, sür-sümük çaqqallarındır,

Ən uca kürsülər naqqallarındır,

Kənardan baxanıq biz bədə-bəddə

Yaşamaq günahdır bu məmləkətdə!

Eşim, üzə çıxsın altdakı qatlar

Diksinib üşənsin kefi babatlar. 

Piylənib şişəndən bu «demokrat»lar 

Quldurlar çoxalıb şəhərdə, kənddə 

Yaşamaq günahdır bu məmləkətdə!

Çox heyif, yaşayıb çatdıq bu vaxta 

Bəylər çırmalanıb dırmandı taxta. 

Şairi yaltaqdır, alimi saxta         

Onların hərəsi min bir sifətdə

Yaşamaq günahdır bu məmləkətdə!

Mən susdum, ardını özünüz deyin  

Xəyalplovlardan doyunca yeyin!  

Qalar bu ölkədə hansı yelbəyin?       

İp ilə birlikdə itibdir it də!

Yaşamaq günahdır bu məmləkətdə!