“Akif Minbaşı günorta saatlarında mənə zəng edərək iki ədəd ATAK hücum helikopterinin təhvil verilməsi barədə tapşırıq gəldiyini dedi. Şənbə günü getməyin daha uyğun olacağını söylədim. Lakin polkovnik-leytenant Murad Polad həftə sonu CH-47 helikopterlərinin təhvil-təslim ediləcəyini, bu səbəbdən də helikopterlərin Bodrumun Güvərcinlik rayonunda yerləşən bazaya göndərilməsini tələb etdi. Bundan sonra 16:30-da birliyimizdə olan 3 helikopterdən ikisi havaya qalxdı. Qısa müddət sonra helikopterlərin Güvərcinlik yerinə Ankaranın Təməlli bölgəsinə getməsi barədə əmr gəldi və saat 21.00-da Təməlliyə eniş etdik. Burada bizimlə birlikdə Quru Aviasiya Məktəbi Komandanlığına məxsus təyyarələr gördüm. Polkovnik-leytenant Hakan Ərol ATAK helikopterlərinin Güvərcinliyə gətirilməsi mövzusunda təlimat aldığını dedi. Saat 22.00-da İstanbulda körpülərin bağlanıldığını görüncə, fövqəladə vəziyyət olduğunu anladım. Hakan Ərol Güvərcinliyə yox, Akınçı bazasına getməyimiz lazım olduğunu dedi. Etiraz edincə, “Güvərcinliyə baxaq, sonra Akınçıya gedərik”,- dedi. 23.00-da havaya qalxdıq. Başkənd Universitetinə yaxınlaşdığımız zaman çox yaxın məsafədən bir qırıcı təyyarə keçdi. Onlara verilən əmri radio danışıqlarından eşidirdim. Səsindən tanıdığım polkovnik-leytenant Özcan Qaracan qırıcılara “Onların avtomobilinə “kobra” deməyin, “əqrəb deyin”, polisin əqrəbini vurun, polisləri vurun”, deyəndə inana bilmədim. Yenə səsindən tanıdığım “Sikorski” pilotu, polkovnik-leytenant Xəlil Gürün “Beştəpə və Bəytəpə ətrafındakı polisləri vurun” sözlərini eşitdim. Bir neçə dəqiqə sonra Güvərcinliyə çatdıq. Vəziyyət əvvəlkindən daha fərqli idi. 3 yanacaq tankeri aerodromda gözləyirdi. Digər birliklərdən texnik və pilotlar hava limanına göndərilmişdi. Polkovnik-leytenant Ərdal Başlar məni qarşıladı. “Xoş gəldiniz. Təcili helikopterinizə silah yükləyin” deyincə əsəbiləşdim. “Nə silah? Kim kimi vurur? Heç nədən xəbərim yoxdur”,- dedim. Texnik və pilot yoldaşlarıma “Heç kim buradan ayrılmasın, heç nə etməyin, silah yükləməyin”,- dedim. İçəri keçərkən Malatya vilayətində xidmət edən baş çavuş Volkan Türkqorxmazı və baş çavuş Mustafa Ormantəpəni gördüm. “Nə edirsiniz”, - soruşanda, “Nəsə etməyə çalışırıq. Sonuna qədər mübarizə aparacağıq”,- dedilər. Tabor komandiri polkovnik-leytenant Murad Poladın otağına getdim. Hakan Ərol da otaqda idi. Belində tapança vardı. “Nə baş verir”,- soruşanda hərbi vəziyyət elan edildiyini dedi. Bunun qanuni olub-olmadığını bilmək üçün “Baş Qərargah rəisinin əmri və ya xəbəri varmı” soruşdum. H.Ərol isə baş barmağını qaldırdı və 2 min səhifəlik əmr olduğunu dedi. Mənə oxuya bilmədiyim və anlamadığım bir yazını göstərib, “Bundan sonra sizə verilən bütün əmrləri icra edəcəksiniz. Etməsəniz, lazım olanı edəcəyik”,- dedi. Bu sözləri deyərkən silahına işarə edərək məni təhdid etdi. Bir otağa keçib televiziyanı izlədim. Prezident və baş nazirin açıqlamasını izləyincə çevriliş olduğunu anladım. Dərhal həyat yoldaşıma zəng edib çölə çıxmamağı tapşırdım. Oturarkən helikopterimizin zədə aldığını dedilər. Necə olduğunu anlamadım. Komandamla birgə qonaq otağına keçdik və səhərə qədər orada qaldıq. Səhər 08.30-da yaxınlarımızın yanına getdik. Saat 10.30-da Malatyadan polkovnik-leytenant Adəm İzgü mənə zəng edərək alay komandirimizin helikopterin vəziyyəti barədə məlumat almaq istədiyini, bu səbəbdən Güvərcinliyə getməyimi tapşırdı. Burada bütün komandam ilə həbs olunduq. Çevrilişin qanunsuz olduğunu anladığım üçün polkovnik-leytenant Murad Polad tərəfindən verilən əmrləri yerinə yetirmədim, helikopteri hərbi təchizatla yükləmədim. Bu səbəbdən çevrilişdə iştirakımı qəbul etmirəm. Silahsız vətəndaşa, digər təhlükəsizlik qüvvələrinə, dövlət təşkilatlarına qarşı silah istifadə edilə bilməz”. /politika.az/
Комментариев нет:
Отправить комментарий