Xatirə Xatun - Gözləmişəm

Sevgilim, mən səni hər sübhi-məsa gözləmişəm,

Çəkmişəm gör nə qədər çövri-cəfa gözləmişəm.

Yatmayıb sübhə kimi razi-niyaz eyləmişəm,

Ki gətirsin xəbərin badi-səba, gözləmişəm.

Səni canımdan əziz bilmiş idim canım üçün,

Ruhumun məlhəmi, hər dərdə dəva gözləmişəm.

Bivəfasanmış, əzəldən bunu dərk etməmişəm,

Demə bihudə yerə mehrü-vəfa gözləmişəm.

Ey vəfasız, bilirəm, gözləməyim yersizdi,

Etmişəm gör nə böyük səhvü xəta gözləmişəm!

Anladım, Xatirə, indi onu sevməklə demə,

Özümə, bilməmişəm, dərdü-bəla gözləmişəm.