BİLDİNMİ

Qəşəm Nəcəfzadə

Dolub yağış damlasına

pəncərənizi sevdim,

bildinmi-bilmədim.

Gözündən sərxoş kimi

yıxıldım ürəyinə

güldünmü- bilmədim.

Özümüzdən öncə

qapıda ayaqqabılarımızın

qoşa dayanmağı sevdim,

sən də sevdinmi- bilmədim.

Sən yatan ürəyimə

başımın sual

əllərimin nida qoyulduğunu

bilirsənmi- bilmirəm.

Əllərin bulud kimi

kölgə salır

saçlarımın işığına,

deyəsən yağış yağacaq

axşama

xəbərin varmı, bilmirəm!