Gözəl Bayramlı: "İslam dini ən demokratik dindir və dünyanın İslam dinindən hələ öyrənəcəyi çox şey var"

Bir qrupun beynəlxalq təşkilatlara ünvanladığı məlum bəyanatla bağlı ölkə ictimaiyyətində reaksiyalar davam edir.

Azərbaycan Xalq Cəbhəsi Partiyasının (AXCP) sədr müavini Gözəl Bayramlı “Deyerler.org”a qeyd edilən bəyanatla bağlı fikirlərini bölüşüb: "Bu müraciətə çoxları kimi mənim münasibətim də mənfidir. Müraciətdə Rafiq Tağının qətlinə münasibət adı altında əslində dini və mənəvi dəyərlərimiz təhqir olunub. Bu müraciəti imzalayanların hədəfində birbaşa İslamdır. Üçrəngli bayrağımızın hər üç rəngi mənim üçün eyni dərəcədə müqəddəs olduğundan mən milli-mənəvi dəyərlərimizin bir qrup adını ziyalı qoyanlar tərəfindən təhqir olunmasını pisləyirəm. Biz müsəlmanıq, dinimizi sevirik, onun prinsiplərinə sadiqik.

 

İslam dini ən demokratik dindir və dünyanın İslam dinindən hələ öyrənəcəyi çox şey var. Cəmiyyətimizin bu müraciətə təpkisi haqlı olaraq çox sərt oldu. Çünki biz söykəndiyimiz ideoloji əsaslar İslam dinimizlə vəhdət təşkil edir. İslamı təhqir etmək, İslamı hədəf seçmək kimi uğursuz cəhdlər bundan sonra da cəmiyyət tərəfindən ciddi təpkiylə qarşılanacaq. Azərbaycan cəmiyyəti öz dəyərlərinə sadiqdir və bundan sonra da belə olacaq. Bu cəmiyyətdə aparıcı dəyərlər milli, mənəvi, dini, əxlaqi dəyərlərdir və bundan sonra da belə olacaq"