DƏNİZLƏR QOVUŞAN YERDƏ

Afaq Şıxlı


QALMIŞAM...


 Yuxunda da buraxmırsan əlimi,
 Xəyal olub otağında qalmışam.
 Toplayırsan balıncdakı telimi,
 Tel-tel olub yatağında qalmışam.


 İntizarsan, zindandı dörd divarın,
 Sevindirmir nə şöhrətin, nə varın.
 Hər yerdəyəm, qarşıdakı çinarın
 Sənə baxan budağında qalmışam.

Eşqim dərddi, sən əlində naçarsan.
 Elə sirr ki... axı kimə açarsan?!
 Unut məni unutmağı bacarsan -
 Nəfəsinəm, dodağında qalmışam.


SƏN O ZAMAN GƏLDİN Kİ...


 Tənim buz bağlayanda
 kimsəsiz otağımda,
 Qəm cövlan eyləyəndə
 soyumuş yatağımda,
 Ümidimin işığı əriyən bir şam kimi
 lap sonuna çatanda,
 Həyat məni
 qaranlıq boşluqlara atanda
 Mən səni harayladım -
 Sən o zaman gəlmədin!


 Don vurmuş qönçə kimi
 saralanda arzular,
 Məni dara çəkəndə
 bu cavabsız duyğular,
 Taleyimin ulduzu köhnə çıraq sayağı
 gözlərini qırpanda,
 Qəddar zaman küləyi
 hisslərimi didərək sağa-sola çırpanda
 Mən səni harayladım -
 Sən o zaman gəlmədin!


İntizarım, həsrətim
 kükrəyib qaynayanda,
 Xoşbəxt günlər mənimlə
 gizlənpaç oynayanda
 Mən səni harayladım...
 ...Sən o zaman gəldin ki,
 bu qismətsiz eşqimi sevgisiz könüllərə
sədəqətək payladım...


DƏNİZLƏR QOVUŞAN YERDƏ


 Nur baxışlım, dərd eləmə,
 Birləşəcək yollarımız.
 "Bundan belə gecdir" demə,
 Qarşıdadır baharımız.


 Unudulmaz o xoş anlar
 Gələcəyin röyasıdı.
 Sevilməyə haqqımız var,
 Dünya - sevgi dünyasıdı!


 Göydə günəş, yerdə torpaq
 Şahid olsun sevgimizə.
 Harda olsaq birgə olaq,
 Çən düşməsin izimizə.


 Sevinc qəmə olsun qənim,
 Ayrılıq sovuşan yerdə.
 Gəl görüşək, ruhum mənim,
 Dənizlər qovuşan yerdə!


MƏNI SABAH UNUDARSAN...


Çalışma ki, məni bu gün unudasan...
Bağrım başı yaralıdır, qandır hələ.
Buz baxışlar ümidi kəsib yaman,
Gəl, daha da yaralama bilə-bilə.


Çalışma ki məni bu gün unudasan...
Vərəqləyək ötənləri sənlə bir az.
Bir qığılcım ara, gülüm, yaddaşından,
Üz çevirsən, bir də geri dönmək olmaz.


Çalışma ki, məni bu gün unudasan...
Silinərmi bir məhəbbət əfsanəsi?
Gülümsəmə göz yaşları arasından,
Bu ağrılar - sevgimizin nişanəsi!


Mənim üçün bu dünyada tək sən varsan!
Dünya küsər – xoşbəxtlərə qarışmasaq!
Canım- gözüm, məni sabah unudarsan,
Əgər bu gün, elə bu gün barışmasaq.