O günlərə qayıt

Emin Piri  

BULUDLARI KİM SAĞIR?!

Şəhərin üst-başı qar,

dərdimiz qardan yağır.

Balacalar soruşur:

buludları kim sağır?!

Boylanıb baxır körpə,

gözündə sual yatır.

Göydən onun üstünə,

ulduzları kim atır?!

Xəzər çəkilib geri,

sahilə çatmır əli.

Danışıb bir söz demir,

donubdu dalğa dili.

Uşaqlar baxır evdən:

Buluddan qar dərməyə,

əlimiz çatmır niyə?!

Çöldə üşüyən qarı

gətirək isitməyə...

TƏLƏSƏN

Böyüməyə çalışan körpə

özü də bilmədən

can atır

isti ana qucağından

soyuq torpaq ağuşuna.

GÜLSATAN QIZIN XƏTRİNƏ

Sənə dön deməyə

Nə cəsarətim,

nə üzüm,

nə də sözüm yox.

Səndən də,

məndən də çox

üzülən birisi var:

Sənin üçün gül aldığım

gözü dolmuş

Yeddi yaşlı gülsatan qız.

Demirəm heç mənə görə,

heç demirəm sevgimizçün.

Amma

o qızçün

o günlərə qayıt,

Qayıt o sevgiyə.

Heç sevməsək belə

bir-birimizi

Tutaq əl-ələ,

Lap yalandan...

O qızın xətrinə.

gül alım sənə...

SON

Çıxın gizləndiyiniz yerdən

ölülər!

Göydən səs gəlir,

eşitmirsiniz:

Oyun bitdi!

GEDİŞ

Arxanca qışqırdım:

EHEY!!!

əşyalarını yığıb,

tələm-tələsik

qaçarkən həyatımdan

unutmusan...

əllərin qalıb əlimdə.

MƏKTUB

Bağışla məni,

oxşamadım

silahım qədər səni.

sarılmadım gecələri

ona sarılantək.

Sən

köksünə sıxıb isindirdin

Mənli xatirələrini.

mənsə
sinəmə sığınan gülləni