Müftə də bahayıq güllələnməsək

Sayman Aruz

Əllərin əlimdə, gözüm gözündə

sevimli bir kədər ürəyimdədi.

Gördüyün bu xoşbəxt, bulut kimidir

Tabutu şəhərin kürəyindədi.

Payımız nə idi?

                        Şeir və şərab.

Haqqımız nə idi?

                        Bilə bilmədik.

Ancaq bu şəhərin kafelərində,

keçmişi unutduq, silə bilmədik!

Siqaret, siqaret, yenə siqaret.

Ya yelə gedildik, ya yellə getdik

Məqsədi olmayan məktublar kimi,

gah elə gedildik, gah belə getdik!

Yorğun bu şəhərdən, bu küçələrdən,

yumuruq çırpıram kərpicə, daşa.

Sevgilər, sayqılar, müharibələr,

xox kimi gəlirlər bu mən külbaşa!

Arağı olmayan qədəhlər kimi

boş olsam faydasız,  dolsam acıyam.

Baltasın gözləyən ağaclar kimi

özüm öz başıma çırpılasıyam!

Əllərin əlimdə, hekəyədir bu

bizsə kağazlardan xalat geymişik.

Pas ilə dəmirin sevgisi kimi

sonumuz ya sınmaq, ya dəli-deşik!

Daraq dustağında yatan güllə tək

müftə də bahayıq güllələnməsək.

Bəzən getməyəndə ucuzlaşırsan,

Güllələ, güllələ,

                           qoy çıxıb gedək...