Musa Aslanxanlı

Azərbaycan şeir antologiyası

                                            SƏNƏ BAXIB…

Başımı bulayıb keçirəm,

Dükanların yanından

Bazarların yanından,

Özümü qurtarammadım,

Dükandan, bazardan.

Başımı bulayıb keçirəm,

Barıların yanından,

Hasarların yanından,

Uzağı görməyən göz

Dad eyləyir hasardan.

Başımı bulayıb keçirəm

Arzuların içindən.

Yalançı arzuların

Getmədimmi ardınca?

Başımı bulayıb keçirəm

Neçə-neçə yazıların içindən.

Günlər axşama dönür,

Bir mətləbə çatınca.

Başımı bulayıb keçirəm

Taleyimin üzünə

Əsnəyən qapılardan...

Ağaca, suya həsrət,

Qurumuş qobulardan...

Başımı bulayıb keçirəm

Bu dünyanın özündən…

Özümdən...

...Yox, atam, sözünü de!

Macal var,

ötkəm danış!

Bəlkə də sənə baxıb

Nə zamandı başını

Bulayır qarğı, qamış.

                                                      AXTARIM

Yol uğurum, yol taleyim,

Azaldımı bir az dərdim?..

Mən nə əkdim, mən nə dərdim?..

Dönüm axtarım, axtarım.

Necə gözəl, necə pirsən,

Necə aşkar, necə sirsən,

Sonsuz göydə deyilmişsən...

Enim axtarım, axtarım.

Zaman–zaman sinəm yanıb...

Bu saf işıq

bu qaranlıq

Məndə necə daldalanıb

Sınım axtarım, axtarım.

Bu nə yalan, bu nə gerçək,

Soyuq nəfəs, solan çiçək...

Hanı, şuma səpiləcək

Dənim axtarım, axtarım...