Qırx gün çəkməliydi bu hər nəydisə

Emin Piri    

Allah da qorxur təklikdən

Qar havanı soyudur,

İnsanlar – Sevgini.

Üşüyür duamda Allah kəlməsi.

Bir az fərqli dualarla

isidək Allahı bəlkə?!

O da bezib

min illər boyu

eyni duaları

təkrar-təkrar eşitməkdən.

Qızdırım

Insanlardan soyumuş Allahı

Öz ehtiraslı dualarımla.

Hə, düzdü,

Allah olub

mələklər arasında yaşamağa

rahatdı göy üzü.

Oğulsansa

Di gəl insan ol

bu şəhərdə

adamlar arasında.

Allah olanda nə olar,

O da qorxur təklikdən.

qorxduğuyçün qorxudur

bəlkə də sevdiklərini!..

və...

Gizlədir öz yerini.

MƏMMƏD İSMAYILA

Daha qapı döymür ağacdələnlər,

Yorulub dimdiyi, dişi bir ildir.

Ömrü cox çəkməz e... bu qandalın da,-

...Çırpır Prometey daşı bir ildir.

Altda ilan yatan bu otu-layı

Qaldırdın,

üstünə yeridi ayı.

Adam öldürənə medal havayı,

Görüb dinməyənin işi bir ildir.

Haqq batır dünyanın nahaq üzündə,

Çör-çöplər gur çayın axar üzündə.

Bağlı qapıların arxa üzündə

Özün kefə tutub naşı bir ildir.

Bir şah fərman verir, biri qol çəkir

Qollu kağızların yükün el çəkir.

Varlının yayı da ildə il çəkir.

Lüt-üryan yetimin qışı bir ildir.

Savalanda yatan belin əydisə,

Baba Dərvişə də xəta dəydisə...

Qırx gün çəkməliydi bu hər nəydisə...

Qırxı çoxdan keçib yaşı bir ildir