Laçın Məmişov - GÖRÜNDÜ

Alim Qasımovun 55 illik yubileyinə həsr edirəm

Göz açdığı gün, islami fitrətdə göründü
İmanda əsas altı olan şərtdə göründü

Bir möcüzə, bir sirr ki, tək Allaha əyandır
Bəmdə yaranış, zildə qiyamətdə göründü

Duydum səsini röyada ikən o müəzzin
Dan sökdü yerin, sübhə minarətdə göründü

Gəldi o nəfəs qeybdəki səslə, İlahi !
Peyğəmbər Əfəndim mənə hicrətdə göründü

Elmin o qədər verdi mükəmməl ona Xaliq
Sufi Babamız zikri-qiraətdə göründü

Əxlaqı - ədəb sahibi Alimi-həqiqdir
Çox oldu nümunə  mənə, ibrətdə göründü

Sirli avazın qoydu bütün aləmi heyran
Hifz etdi çəkən həsrəti, qürbətdə göründü

Çoxdandı Laçın mədh edəcəkdi səni Alim
Qismət bu ziyarət, bu ziyafətdə göründü

Şamaxı şəhərinin Bakı əyaləti 14 avqust 2012-ci il