İnönü bəzətməsi…

Natiq Cəfərli                     natiqceferli.blog.ru

YAP partiyasından olan bir çox deputatlar, hökumət və hakimiyyət nümayəndələri, tez-tez  Heydər Əliyevi Mustafa Kamal Atatürkə bənzədirlər. Bu bənzətmənin nə qədər yerində olub-olmamağını, indi araşdırmaq fikrim yoxdur. Qoy hər kəs özü buna qərar versin. Sadəcə onu demək lazımdır ki, Atatürk bir neçə dövlətə döyüşdə qalıb gələrək, Türkiyə Cümhuriyyətini qurdu, qardaş milləti modern, dünyəvi quruluşla tanışdırdı. H. Əliyev isə, 10 il hakimiyyətdə olmasına baxmayaraq, bir döyüş belə udmadı, bir qarış torpaq belə düşməndən alınmadı…

Atatürkdən sonra Türkiyənin başına İsmət İnönü keçdi. “Milli Şef” adlandırılan bu şəxs, Türkiyənin İkinci Cahan savaşından qadasız-bəlasız çıxmasını təmin etdi. Savaşdan sonra, Türkiyə çoxpartiyalı sistemə keçdi, və 1950-ci ildə, ilk dəfə tam şəffaf, ədalətli seçkilər oldu, və Cümhuriyyəti quran insanların partiyası, o dövrdə İsmət İnönünün rəhbərlik etdiyi Cümhuriyyət Xalq Partiyası seçkiləri uduzdu. Qurtuluş savaşını, yüzlərlə irili-xırdalı döyüşləri bir komandan kimi udan İsmət Paşa, məğlubiyyəti qəbul etdi və dedi: “Bu mənim həyatda qazandığım ən böyük qələbədir, Türkiyəmiz üçün xeyirli-uğurlu” olsun”.

Halbuki, o zaman ordu, polis, məhkəmələr, İsmət Paşanın tam nəzarətində idi. Tək bir işarə bəs edərdi ki, güc strukturları hakimiyyəti saxlamaqda İsmət Paşaya kömək etsin, məhkəmələr isə repressiyalara haqq qazandırsın. Amma Paşa Türkiyə naminə, gələcək naminə, bu addımı atmadı. 

Mən çox arzu edərdim ki, gələcəkdə, İ. Əliyev İsmət Paşaya bəzədilsin, və bu bənzətmə, Atatürk-Heydər Əliyev bəzətməsi kimi, qıcıq yaratmasın. Bu hadisədən bu qardaş örnəyindən, hakimiyyət, YAP, və ən əsası, İ. Əliyev dərs çıxartsa, ölkəmiz üçün, millətimiz üçün, gələcəyimiz üçün ən önəmli və uğurlu iş görmüş olarlar…