Salam Sarvan

                BU SU KEÇƏN YOLDA QALXAN NƏ TOZDU

Həsrətin qarışmış iki rəngiyik,

gəl sənnən ayrılaq, uzaqlaşaq, heyy?

Mən gedim dolanım Qara torpağı,

Sən dola boynuna kəfəni Ağ, heyy?

Bu su keçən yoldan qalxan nə tozdu–

uçan yağışların səfini pozdu?!

Olanım sən idin, səni uduzdum,

bəs nədən oynayaq sənnən, uşaq heyy?

Qalx ağ bayraq kimi, qalx uca sancıl...

başımız üstəki balınca sancıl...

Dur gəl köksümdəki qılınca sancıl

ki, sənnən son dəfə qucaqlaşaq heyy...

                                   HƏLƏ BAŞINDAN TÜK ÇIXIR

Boyun çıxacaq, ay uşaq

uzanıb baxdığın yerə...

Hələ başından tük çıxır

boyunun çıxdığı yerə.

Tanrı bizləri şəkk salmır,

istəyirik düşək, salmır...

Dünya yorğan–döşək salmır

adamı yıxdığı yerə

Qəbrimi gen qazdırarsan,

məni orda azdırarsan.

Ana, məni basdırarsan

boyumu soxduğun yerə.

                                    ARDIM O ÜZDƏDİ, BALA

Məndə ondan özgəsi yox,

o tək özgə də yox mənə.

Yatan mən yuxu görürəm

neçə ildi oyaq mənə...

Oxudun qurtardın məni,

nə çaşmısan, nədi, bala?!..

çevir torpağı o üzə,

ardım o üzdədi, bala.

Dünya mənim tək fikirli,

Sənin tək məzədi, uşaq,

Gəl, mənim yaramnan oyna,

bu yara təzədi uşaq.