YAĞMUR

Elnur Astanbəyli

 (Günel üçün)

bu gün getmə bu gün qal

sabah günəş doğmadan gedərsən

günəş doğmadan arxana baxmadan

bir tanış qəzet köşkünə

vida məktubu buraxmadan

quşlar yuvadan çıxmadan gedərsən

bu gün getmə bu gün qal

bu gün qal

qal, son dəfə mən səni

kilidlənmiş dodaqlarla öpmək istəyirəm

qapanmış gözlərlə baxmaq istəyirəm sənə

hələ yazılmamış şeir kimi oxumaq

hələ çalınmamış şarkı kimi

dinləmək istəyirəm səni

bu gün getmə

getmə

sabaha yağmur söyləmiş sinoptiklər

qal... yağmur başlayınca gedərsən

yağmur başlayınca-

ağlyaraq getməyini

istəmirəm çünki!..