Bu otağın divarı

Xuraman Hüseynzadə

bu otağın divarı
gözlərindən nəm çəkib
sən siqaret çəkəndə
sənə baxıb qəm çəkib

otağını toz basıb
güldanında gül solub
tora saldığın qızlar
dönüb hörümçək olub

belə getsə bu tənha
otaq udacaq səni
qadın qucağı boyda
yataq udacaq səni


paltarların çirklənib
kitabların saralıb
bir otağa sığırsan-
dünyan necə daralıb?!

bu otaq-doğum evin
bu otaq-qəbir yerin
nə zamansa öləcək
yaxşı şairin biri...