Nərmin Kamal, şeirlər

                                    SƏKKİZİNCİ MÖCÜZƏ

Qocalar evi

köhnə radioda «Amerikanın səsi»ni dinləyirdi qocalar

radio dünyanın yeni yeddi möcüzəsini sayırdı:

internet

Şərqi Afrikadakı Serengeti Plain

Maya piramidaları,

Quzey və Güney qütbləri

Yerusəlim,

Tibetdəki Lhasa din mərkəzi,

Havaydakı Marine abidəsi

səkkizinci möcüzə də var,

bunu da siz tapın, nədir– dedi

və yayımını bitirdi.

xəbərləri dinləyən qocalar

heç düşünmədən

«insanların ölümə çarə tapmamasıdır» dedilər

və sinələrini arıtlaylb öskürdülər

bir də öskürdülər

revmatizm ağrılarından keyimiş dizlərini

yorğan altına çəkib yuxuya getdilər...

yuxuda səkkizinci möcüzəni gördülər

gördülər ki çarə tapılıb ölümə

daha ölməyəcək, bir də heç vaxt ölməyəcəklər

inanılası deyil

fəqət tapılıb çarəsi ölümün

çiynimə pencək sal üşüdüm...

elə bu vaxt

yuxunun bu cazib yerində

gör nə etdi

yandırdı qocalar evini gənc üsyankarlar

əllərində qocalara ölüm şüarı vardı

yuxuya çin olmaq imkanı qıyılmadı

qocalar yandı

yanmış xarabalıq ortasında

anteni ərimiş, qutusu qaralmış

markası pozulmuş radio

artıq soruşmayacaqdı

«səkkizinci mocüzə də var,

bunu da siz tapın, nədir»– deyə

bu suala dəqiq cavablar verilən yerdə…

                                  ALLAHI BAĞIŞLAMA

Bir gün

Allah bizdən üzr istəyəcək

Bir gün

həyatın gətirdiyi oyunlar,

hər gün yeni düyünü açmaq çabası

keçidlər

yeni sevgilər

üsyanlar

göz yaşları

çörək savaşları

batmayıb ayaqda qalmaq,

yaşamaq və yaşatmaq qovğası

intiqam almaq ehtirası

ala bilməməyin yası

artıq dözülməz olanda

tək və gücsüz uzananda qəsəbə səkilərində

Allah üzr istəyəcək bizdən

Bağışla

-deyəcək, qızım

bağışla ki,

sənə yaxşı tale vermədim

təəssüflər içində keçir ömrün

bağışla, mənim balam

-deyib hönkürəcək

Mən onu başa düşəcəyəm,

qolumu qaldırıb sarılacağam boynuna

üç dəfə yüngülcə

kürəyinə vuracağam əlimlə

eybi yox, deyəcəyəm,

Eybi yoxdur

Əlini saçlarımın arasına salıb dolacaq,

bunu belə sarışın etmədim,

bunu belə qıymadım sənə- deyəcək,

Yaxşı, belə də sevənlər oldu mənim

qara saç da pis deyil- deyəcəyəm

-Peşman olmuşam,

sevdiyin pişik balalarını belə yaşatmadım

üçünü bir gecədə öldürdüm,

-Bəsdir, deyəcəyəm, üzmə özünü

başqalarının da pişikləri ölür,

hətta uşaqları ölür

Allahın boğazı qəhərlə dolacaq

daha möhkəm hönkürməyə başlayacaq

acizəm, bağışla

-təkrar-təkrar bunu hıçqıracaq

mən də ona qoşulacağam

-yaraşmaz sənə kiçilmək

bəsdir, onu sakitləşdirməyə çalışacağam,

bundan daha pis həyatlar var

narahat olma, yaxşıdır hər şey- deyib

gözlərini siləcəyəm

allahı əfv edəcəyəm