Qərar verməyi bacarın

Cavanşir Aləmmədli


Bir çanta düşün, hərəniz bir tərəfindən tutmusunuz. Sən baxma onun var gücüylə dartıb aparmaq istəməyinə, sən də bir güc verib qaldırmadıqca, o çanta sürünməyə məhkumdur. Bir qərar ver artıq, ya burax o ipi, ya da qaldır daşımağına kömək et. Düşünmə ki, bu həmişə belə davam edəcək. Düşünmə ki, o, bu işi tək davam etdirməyə tab gətirə biləcək. Bir zaman keçəcək, o ipi buraxacaq. Özü də bir dəfəlik. Bir də geriyə baxmadan. Artıq tab gətirməyib, bütün çəkdiyi əzablara son vermək üçün buraxacaq.

Yox, düşünmə ki, o yolundan dönən deyil, mütləq bir bəhanə çıxacaq ortaya. O bunu istəməsə belə, artıq çanta bir qulpdan daşınılmağa tab gətirməyəcək. Nə edirsən et, o ipin qırılmağına imkan vermə. O qırıldısa... O qırıldısa, artıq hər şey bitmiş deməkdir. Cürbəcür bəhanələrlə onu geri qaytara bilsən belə, artıq bütün güc sənə düşəcək, onda səndən yana bir hərəkət görünməyəcək. Bu da sənin həyatını zindan edəcək...

********

Havadakı durnanı əldə etmək üçün, əlindəki sərçəni uçurdun. Sonunda sərçə də səni tərk elədi. Durna onsuzda sənə tərəf baxmış deyildi. Tək onun xəyalıyla yaşadın, sərçəylə də əlaqəni kəsmədin ki, birdən o alınmasa, bununla davam edim. Amma onu düşünmədin, elə ona görə bütün münasibətləri çiynində daşıyan o, artıq dözmədi. Bilmirəm sonunda qulp qırıldı, yoxsa o mu vaz keçdi. Hər nədirsə, artıq o səndən qurtuldu, sən də onu itirdin. Məndən nə edəcəyini soruşursan, sənə bir şey deyə bilərəm. Artıq çox gecdir. Getmək vaxtı gəlibsə “getmə” demənin, zaman keçibsə “qayıt” demənin mənası yoxdur...