Sevgilim,
yaş günüm oldu
sən gəlmədin-
payız gəldi.
Sevdiyin qönçə dodağı
sən öpmədin-
çiskin öpdü.
«Canın mənimdir» deyərdin.
«Canın bəsimdir» deyərdin.
Qısqandığın o canımı
duman qucdu-
sən qucmadın.
Bədənimi ürpədərdi
«Səni sevirəm,
Səni sevirəm» pıçıldamağın.
Ruhumu da
tək qoymadı
göy gurladı «Varam!»- dedi.
küləyi də qıqanardın
Külək toxundu telimə həzin-həzin,
xəfifcə
tüklərim biz-biz oldu
bütün vücudum
titrədi.
Həzz aldım
səndən uzaqda
həzz aldım
səndən gizlicə,
bağışla məni, əzizim!
Təbiət oldu sevgilim-
bağışla,
dözə bilmədim
sənə xəyanət elədim…
***
Mənim hər şeyimi aldın
Əvəzində sevgi verdin yarımçıq
Mənim canımı, ruhumu bütöv aldın
Canını da, ruhunu da təqdim etdin
yarımçıq
Mənim hər şeyimi aldın!
evimi, işimi, nəslimi.
Sən aldın- mən verdim.
Qurban etdim sənin bir telinə.
Əvəzində nələrsə verdin mənə,
hamısı da yarımçıq.
Mənim hər şeyimi aldın,
bir şeydən başqa-
içimdəki Allah verən istedaddan,
yazmaq həvəsindən,
hisslərimi
sözə, qafiyəyə, şeirə çevirməkdən
başqa…
Комментариев нет:
Отправить комментарий