Təfəkkür Universiteti generala saxta diplom verib?

24 fevral tarixində Qaynar.info-da dərc olunan “Baytar necə general oldu? – ŞOK FAKT” yazısı mediada və sosial şəbəkələrdə böyük rezonans doğurdu. Demək olar ki, bütün medianın tirajladığı araşdırmamızdan sonra da mövzu ətrafında suallar bitib-tükənmədi.

Xatırladaq ki, yazıda Dövlət Gömrük Komitəsinin sədr müavini Nazim Xeyrulla oğlu Məmmədovun 1999-cu ildə- nə az, nə çox, düz 48 yaşında Təfəkkür Universitetinin hüquq fakültəsindən məzun olmasından, 1995-ci ildə Gömrük sistemində işə başlamasından və 8 il ərzində kosmik surətlə necə general olmasından və Komitə sədrinin müavini vəzifəsinə qədər irəliləməsindən söz açılırdı.

Bir çox oxucular və ekspertlər araşdırma dərc olunandan sonra diqqəti məhz birinci məqama- generalı 48 yaşında ali məktəb diplomu almasına yönəltdilər. 1998-ci il elə də uzaq dövr olmadığı üçün mövzunu araşdırmaq, Nazim Məmmədovun doğrudan da bu ali məktəbin tələbəsi olub-olmadığını aydınlaşdırmaq elə də çətin olmamalıydı.

Şübhələrimizin artmasına həm də araşdırma dərc olunar-olunmaz Dövlət Gömruk Komitəsinin rəsmi saytında Nazim Məmmədovun təcümeyi-halına əl gəzdirilməsi oldu.

Genaralın bioqrafiyasından «1999-cu ildə Təfəkkür Universiteti»nin hüquq fakültəsini bitirmişdir» bəndi çıxarılıb. Bununla da komitə rəhbərliyi guya bəzi faktları gizlətməyə çalışıb. Amma dəyişiklikdən əvvəlki tərcümeyi-halın fotosurəti bizdə var və onu aşağıda təqdim edəcəyik.

Artıq arqument.az-a verilən ilginc məlumata görə, Nazim Məmmədov “Təfəkkür” Universitetinə Tələbə Qəbulu üzrə Dövlət Komissiyasının (TQDK) elan etdiyi test imtahanlarında iştirak etmədən qəbul olunub. Yəni rektor Müşfiq Atakişiyev diplomu ona hədiyyə edib. TQDK-nın bazasında isə onunla bağlı heç bir məlumat yoxdur. Məhz bunları nəzərə alan general təhsili ilə bağlı faktları gizlətməyə çalışıb. Sayt sual verir: “Bu generala diplomu rektor Muşfiq Atakişiyev neçə manata satıb və ya general “Təfəkkür”də təhsil almasını kimdən və nədən gizlədir? Məgər “Təfəkkür” Universitetində oxumaq ayıbdır? Əgər deyilsə, onda general niyə bunu ictimaiyyətdən gizlətdi? Deməli, məsələnin başqa şübhəli tərəfləri var”. Mövzunu davam etdirəcəyik. /yenilik.az/