Aytən Nəsibbəyli - Cazibə qüvvəsi

Sevdiyimiz qızın
saçını dartıb qaçacaq qədər
sevdi çoxumuz.
Əslində sevgi
şeytanın bir uşağın qəlbində
sığa bildiyi qədər idi.
Məsum və təhlükəli.

Bilirəm,
ayrı-ayrı yerlərdə dayanmışdıq biz.
Sənə gedən yollar var idi:
Uzun, döngəli.
Mən döngəni döndüm.
Yol bitdi.
O an gözlərindəki təbəssüm nə idi elə?
Məsum və təhlükəli.


Səni göylərdə tapdım mən.
Yerlərdə nə işin var?
Söylə, hörmətli fizik, söylə.
Niyə,
nədən cazibə qüvvəsi yalan olmaz bir dəfə?
İnsan dediyimiz
hər dəfəmi yenik düşər təbiətə?