“Amerikanski” toxumlar və inəklər

Rüfət Əhmədzadə

Bu günlərdə sahibkar Arif Süleymanovun  “Azərtoxum” MMC ilə bağlı şikayətlərini araşdıraraq, bir neçə məqalə yazmışdım.

Peşəkarlığa və öz prinsiplərimə uyğun şəkildə də, adıkeçən bütün şəxslərin fikirlərinə yer verməyə çalışdım.

Belə ki, A.Süleymanovun sözlərinə görə, “Azərtoxum” MMC ona kiloqramı 16 manatdan keyfiyyətsiz qarğıdalı toxumu sırıyıb (“amerikanski kukuruz” adı ilə), amma sonra məlum olub ki, bu toxumlar yerli bazarda 1 kiloqramı 30 qəpiyə satılır. Sahibkarın sözlərinə görə, nəticədə məhsulu zəif olub, “Azərtoxum” isə bütün məhsulun 90 faizini özünə götürüb.

“Azərtoxum”un direktoru Məzahir Qasımov isə  ittihamları şərh etmək əvəzinə birinci gün jurnalisti söydü, ikinci gün qonaqlığa dəvət etdi, üçüncü gün isə ağdamlı bir şairi söhbətə “kurs” elədi. Həmin şair isə gecə 12-nin yarısında zəng edib mənə bol-bol şeirlər oxudu və hətta səsimə heyran olduğunu da təntənəli şəkildə qeyd elədi.

Şeir deməsi hələ yaxşı idi, bu şairin növbəti gün zəng edib, Rəqsanənin repertuarından “Mən səni görmək istəsəm hara gəlim?” misrasını gubbuldatması əməlli-başlı “qarğıdalı inqilabı” oldu.

Məzahir Qasımov Arif Süleymanova nə deyib bilmirəm… Amma mənə demişdi ki, toxum İtaliyadan gətirilir. Onun “müdirim” dediyi Zeynal Əliyev isə deyir ki, bu toxumlar İsveçrədən gətirilir. Bir-iki gün sonra isə məlum oldu ki, “Azərtoxum” 2016-cı ildə ölkəyə cəmi 20 ton (ümumi toxumluq qarğıdalı idxalının 1,8 faizi) Gürcüstan mənşəli toxumluq qarğıdalı gətirib. Məzahir Qasımovun öz sözlərinə görə isə 2015-ci ildə “Azərtoxum” ölkəyə toxum idxal etməyib.

“Amerikanski” toxumlardan danışdım, bir az “amerikanski” inəkləri yada salaq. 2012-də “Beşmərtəbə” tərəfdə işləyirdim. Bir gün “Nizami”dən çıxıb 65-ə minəndə radioda belə bir söhbət eşitdim: “Amerikadan gətirilən inəklər artıq yerli mühitə tam uyğunlaşdırılıb. Görək, yerli fermerlər nə deyirlər: “Əvvəl dillərini başa düşmürdük, çətinlik çəkirdik. Amma sonra öyrəşdik, indi bir-birimizi başa düşürük”. Və kişidən dərhal sonra “Mööö” inək səsi”.

Avtobusu qəhqəhə bürüdü. Əvvəl elə bildim ki, nəsə yumoristik radio proqramıdır. Amma ardınca ciddi-ciddi xəbərlər gəlməyə başladı. Beş ildir hər yadıma düşəndə ilk dəfəymiş kimi gülürəm… Görün, o reportajı hazırlayan müxbir necə “kayf” tutub!

Öz aramızdır, bəlkə, “Azərtoxum”un gətirdiyi “amerikanski”toxumlarla bağlı vəziyyət də oxşardır. Sahibkarlar bu toxumların “dil”ini tapa bilmirlər?!

İşin ən qəlizi də yarı-“amerikanski”, yarı-“italyanski” olan toxumların dilini tapmaqdır.

qafqaznews.az