Səni axtardım yenə

Kürçaylı Məmmədov

Yoxsan, elə uzaqsan
səhər açıla bilmir.
Daha şəkillərindən
üzümə işıq düşmür.

Dağılır yastığıma
başqa qadın saçları.
Özgə bədənə qızır
yatağımın sol yanı

Siqaret kimi çəkdim
bütün xatirələri.
Yarı sən, yarı sənsiz
tütün xatirələri.


Səni axtardım yenə
musiqi notlarında.
Səhərin günəşində,
gecənin qatlarında.

Kaş yenidən dönəydin,
yenidən doğulaydın.
Üzülən ümidlərə
bir baş daşı qoyaydın.

Sonra üzünü sürtüb
o daşa, hönkürəydin...
Uzaq, elə uzaqsan
nə fərqi ki bu dərdin.

Gözlərini unutmaq
asan deyil, bilirsən.
Yaxşı ki bu taleyə
gülümsəyə bilirsən...