Qovuşa bilmir

Aybəniz Əliyar

Gülən  gözlərində həsrətim qonaq,
Adımı çağırmır şirin dodaqlar.
Sənin mənzilində sönüb od-ocaq,
Mənim mənzilimdə soyuq otaqlar.

Yenə  zülüm edir tərsliyin sənə,
Yenə də qürurum aşağı düşmür.
Sənin mənzilinin pəncərəsinə 
Mənim mənzilimin işığı düşmür.

Eşqi  zəhərləyib ömrə qatırsan,
Belə yavaş-yavaş mən can verirəm.
Nə sən mənzilində ocaq çatırsan,
Nə mən mənzilimi isindirirəm.


Gecəköynəyini yenə soyunur,
Ay bu gözəllikdən ilhama gəlmir.
Mənzillər həsrətdən tutuşub yanır,
Didərgin ürəklər qovuşa bilmir.