Mən cənnətlik adamam...

Günel Treu

Mən cənnətlik adamam, ay dost
Cəhənnəmi gözlərimlə gördüm mən
                             bu dünyada...
         Ürəyim yandı, ağrısını bildinmi?
Gördünmü çəkdiklərimi? 
                                     duydunmu?
Ruhumu incitdilər, ağlatdılar məni...
        düşdümü yada?
Soydular ürəyimin dərisin,
                           göynədim...
Yastığımdan göz yaşı qoxusu gəldi
O qoxuyla yatdım mən hər gecə....
                   Soruşma necə?!
Hər kəs mənə xoşbəxt kimi göründü
                              özümdən başqa.

Axşam gözlərimə yığılmış damlaları,
     Səhər əllərimlə sildim
                        Özüm bildim qədrimi
Ayağa qalxdım, qanayan dizlərimi
                özüm sağaltdım əllərimlə!...
Mənə Allahı tanıtma, ay dost
                      səndən yaxşı duyuram,
Gedəcəm bir gün yanına, əgər varsa
          diz çökəcəm qarşısında,  
Sevmədiyin bəndə gəlib deyəcəm....         
Mən cənnətlik adamam, ay dost
Cəhənnəmi gözlərimlə gördüm mən
                             bu dünyada...