İlahi, yaşamaq istəmirəm!

Tural Əli

Hər səhər ayıldıqda heç təəssüf hissi keçirmisinizmi?
Hər gün ağırlaşan vəziyyət, hər gün artan zülm, sosial ədalətsizlik, insan haqlarının heyvan haqlarından dəyərsiz olduğu dünyada yaşamaq istəmirəm! Fələstinli bacımın sionist əsgərləri tərəfindən küçənin ortasında döyüldüyü, hicabının açıldığı dünyada yaşamaq istəmirəm. İstəmirəm ki, itinə min manatlıq ət alan, lakin evində işləyən bağbana 150 manat maaş verən azərbaycanlı məmurla eyni havanı udum! Rəzil vəhhabilərin qadın, qoca, uşaq başı kəsdiyi, zülmün tüğyan etdiyi dünyada yaşamaq istəmirəm! Qarabağ əlilinin çarəsiz, naəlac qaldığı və onun canı, qanı üstündə firavan həyat yaşayan, yoxluq bilməyən məxluqların kef çəkdiyi dünyada yaşamaq istəmirəm!

80 yaşlı qoca qadının bir quru çörək üçün üzünü bağlayıb küçə süpürdüyü və həmin küçədən keçən məmurların sayıb qurtara bilməyəcəyi pulların onu narahat etmədiyi insanlıqla birlikdə yaşamaq istəmirəm! Atanın öz qızı üçün cehiz ala bilmədiyinə görə utandığından hər gün ölmək istəyən insanlığa görə yaşamaq istəmirəm!
İnsanların qanı ilə işləyən zalım sistemlərin hər gün daha da insanlığı məhv etməsi, Qarabağda, Fələstində, Suriyada, İraqda, Əfqanıstanda, Pakistanda, insan qanının dəyərsiz olduğu dünyada yaşamaq istəmirəm. Dünya heç bu qədər qana boyanmamış, heç bu qədər rəzil, şərəfsiz, vicdansız, ürəksiz, heyvandan da aşağı qatilləri öz üzərində gəzdirməmişdi. Belə cani dünyada yaşamaq istəmirəm!
Qonşusu ac, özü isə tox olanların vicdanlarının öldüyü, ancaq özünü düşünən toplumla birlikdə yaşamaq istəmirəm!
Əhli beyt (ə) və tərəfdarlarının qatillərinin cəzasız qaldığı dünyada, haqsız yerə qadınları, kişiləri, uşaqları ailəsindən uzaq tutan zalımların etdiklərinə görə bədəl ödəmədiyi dünyada yaşamaq istəmirəm!
Bütün bu rəzillikləri görüb də çarəsiz qalmaq, eyni anda Fələstində döyülən bacının, Suriyada qətlə yetirilən ananın, İraqda öldürülən uşağın köməyinə çata bilməmək çox ağırdır. Bu dərdi özünkü bilib onu onlar qədər yaşamaq... Dözmək olmur İlahi, dözmək olmur...
Ürək bu zülmlərə dözmür artıq! Bu qədər qəmə necə dözmək olar axı? Nə vaxta qədər zülm qələbə qazanacaq, məzlum dərd çəkəcək! Bu haqsızlığın bir sonu olmamalıdırmı?
İmam Mehdisiz (ə.f) bir dünyada yaşamaq istəmirəm!
Mərhəba bil movt, fi səbilillah.

islamazeri.az