Qocalığın təsviri

Dilqəm Əhməd

Bir gün qocalsam əgər

9 may sevinci ilə yaşayan veteranlar kimi

Gözlərim müharibə atəşi ilə yanmayacaq.

Gəncliyin ehtirasında da,

qocalığın müdrikliyində də

Savaşlara qarşı olacağam.

Hərb tarixi ismimi anmayacaq

Bir gün qocalsam əgər

Uşaqların üzümə gülümsəməsini

Əllərimin qırışları ilə ömrümə səyahət etməsini

Gənclərin bir çay kənarında

əbədi uyuyan filosofun yanında

gömməsini istəyərəm.

Qocalıq zülm deyil,

zülm harada qocalmaqdır

Qocalıq siyasət kimidir

Bəzən məhbus,

bəzən elita olub ucalmaqdır

Olar ki, bir gün öldürülsəm

Təhlükəsizlik kamerasından

ölümümü izləməyin

Kameranın bulanıq görüntüsündə

aciz təsvirimin qalmasını istəmirəm.