TƏCNİSLƏR

Bəxtiyar Hidayət

1.

Doğulan qul kimi doğulur burda

Nə bəy ata qaldı, nə xanım ana

Evini başına uçurar zalım

Nə daxmaya baxar, nə xanimana

Ölkə qaldı beş-on tazıya, qurda

De kimə yem oldun- tazı ya qurda?

Molla, yüz məclis qur, taziyə qur da

Nə şah gələn deyil, nə xan imana

Burda  ağı qoyur qara mat daha

Atır dalınca da qaramat daha

Bir deyin o üzü qara məddaha

Öyməsin nə şahı, nə xanı mənə

2.

Ürək bölünərsə əlacı yoxdu

Çəpərin əlacı sim sarı, simdi

Sazım simlənmədi, yaram simləndi

Bu sim bizə yaman simsar isimdi

Simsardı saatda əqrəb əqrəbə

Simsardı səhrada əqrəb əqrəbə

Getsin ilan qohum, əqrəb əqrəba

Aşiqlik edənin simsarı simdi

Çıxmaz toxunana toxunsan, canın

Sən də ürəyinə toxun sancanın

Gedib özgəsinə toxun sən canın

Dəymə Bəxtiyara sim sarə simdi

3.

Belə çiçəkləndi bizim də ölkə

Açıldı bənizlər ha sarı, sarı

Yenə bitməz hasar-hasar oyunu

Yüz dola hasarı, ha sarı, sarı.

Demə daş-qaş tale, üzük ömürdü

Ömrün sökük ömür, üzük ömürdü

Yenə bu ölkənin üzü kömürdü

Yüz olsun yol boyu hasarı sarı.

Məni qışda vurma qara qan keçər

Ağ qan, qırmızı qan, qara qan keçər

Yenə ürəyimdən qara qan keçər

Bəxtiyar, yaramı ha sarı, sarı

4.

Fələyin tərs üzü- dolaşıq kələf

O da ki yerbəyer düyündü, düyün.

Hər gün qara gündü bu yerdə, həm də

Hər gün toy- bayramdı, düyündü, düyün.

Cəm olub xanəndə molla, xanəndə,

Birdi toyxanan da, mollaxanan da

İki qazanan var- molla, xanəndə

Bol olsun a millət düyün, düdüyün.

Şair Bəxtiyarın təbi bəllidi

Dərd birdi, dərman yox, təbib əllidi

Yarım loğman əlli, təbib əllidi

Yenə sinəm üstü düyündü, düyün

5.

Düşdüm bu sevdaya, çıxdım var-yoxdan

Ya varı qaydala, ya yoxu, dilbər.

payız öz fəslimdi, məni oxusan

qış oxu, yaz oxu, yay oxu, dilbər

qaragün saçlara qar işıq oldu

yol yoxuşa çıxsa qarışı qoldu

mənim toyum-vayım qarışıq oldu

öz eşqimi vurdu yay oxu, dilbər

zəhərdir mədənin ödə ki borcu

bor borc gətirməsin, ödə ki borcu

nədi Bəxtiyarın ötəki borcu

sirrini ellərə yay, oxu, dilbər