Göyü zibilləyənlər

Ülvi Məmmədli      

Professional Oxucu Liqası

Xarvey bizim vaxtımızda yaşasaydı, prokurorluq işçiləri tərəfindən “mükafat”landırla bilərdi
 
 Prokurorluq işçilərinin bayramı idi. Hamısını təbrik edirik. Kaş maaşınız yüksək, işiniz az olsun. Yəni az işlərə baxasınız. Elə bu xəbərin verildiyi saytda iki xəbər sonra yazırlar ki, bu gün təbəssüm günüdür. Əvvəl elə bildim zarafat edirlər, prokurorluq işçilərinin bayramı nədi, təbəssüm günü nə? Yəni deyirsiniz prokurorluq işçilərinə gülək, onların baxdıqları işlərə, yoxsa öz günümüzə? Dedim yəqin bu zarafatı eləyənlər qurd ürəyi yeyiblər. Nədi, restoranda bir milyona ayını kəsdirmək olur, qurd ürəyi zakaz eləmək olmaz?

Sonra bu ikinci xəbəri diqqətlə oxudum, gördüm yox, elə həqiqətən təbəssüm məsələsidi. Deyir, bu Bayramın mövcudluğu üçün dünya əhalisi rəssam Xarvey Billə minnətdar olmalıdır. Keçən əsrin ortalarında Amerikada yaşayan rəssamın yaradıcılığı heç bir maraqlı əsərlə fərqlənmirdi. Buna baxmayaraq sığorta şirkətinin nümayəndələri xahiş edirlər ki, şirkətin vizit kartları üçün nə isə yaddaqalan simvol hazırlasın. Xarvey çox düşünmədən sifarişçilərə indi də internet istifadəçiləri tərəfindən çox istifadə olunan sarı rəngli gülümsər üz simvolunu təklif edir. Az bir müddətdə bu simvol Bellə böyük şöhrət gətirir. Çox keçmədən Xarvey Bill Beynəlxalq Gülüş Günü adlanan bayramın keçirilməsini təklif edir. O hesab edir ki, bu gün mütləq yüksək əhval-ruhiyyəyə həsr olunmalıdır.
 Olsun, başınıza dönüm, olsun. Amma bu Xarvey bizim vaxtımızda yaşasaydı, prorkurorluq işçilərinin bayramına şərik çıxdığı üçün Xələcə putyovka ilə mükafatlandırla bilərdi... Amma o ki, ötən əsrdə Amerikada yaşayıb, onda kimsə oranın dilində ona "gözün üstə qaşın var" deyə bilərdi ki.
 Oxuduğum bir xəbər az qala qanımı qaraldacaqdı. Roskosmosun rümayəndəsi deyib ki, bu il orbitdə kosmik zibilin miqdarı yaman artıb. Yaxşı ki, bizim boynumuza şər atmırlar, deyirlər bu bədbəxt orbiti əsasən raket buraxan ölkələr zibilləyir. Rusiyadı, ABŞ-dı. Son vaxtlar Çin də lap zibilini çıxarıb. Mütəxəssislər hesablayır ki, göydəki zibilin 40 faizi Çinin, 28 faizi ABŞ-ın, 26-sı Rusiyanın qalan 7 faizi kosmosla işləyən başqa ölkələrin payına düşür. Mənim bədən tərbiyə müəllimim bir az zəif olub, ona görə riyaziyyatı yaxşı bilmirəm, amma barmaq hesabı baxanda bu rəqəmlərin cəmi 101 eləyir. Deməli, plandan artıq da zibilləyirmişik. Belə getsə zibilin içində yaşayacağıq. Əgər dünyanın zibilyığanları da bizimki kimidirsə...