MƏMMƏD HƏBİB

  Məmməd Həbib oğlu Səfərov 01 dekabr 1967-ci il tarixdə Lənkəran rayonunun Kərgəlan kəndində , şair və dövlət xadimi Həbib Səfərovun ailəsində anadan olmuşdur.O, M.F.Axundov adına Azərbaycan Dövlət Rus dili və Ədəbiyyatı İnstitutunu bitirmiş, bir müddət müəllim kimi fəaliyyət göstərmişdir."Bahar" adlı ilk şeiri 1985-ci ildə "Lənkəran" qəzetində dərc edilmişdir. 2002-ci ildə şairin "Tənha işıq adası" adlı şeirlər kitabı nəşr olunmuşdur. Gözəl insan, ədalətli dövlət qulluqçusu olaraq Məmməd Həbib hazırda Lənkəran ŞİH-də məsləhətçi vəzifəsində işləyir. 

                                                                  HƏLƏ

  Hələ yolum düşməyib, amma demə
  gəlmərəm
  Hələ yaşım o yaş yox, tez də gələ 
  bilmərəm.
  Hələ dünya uzunu gedəsi yollarım var
  Yaşanmış günlərimdən götür məni sən apar.
  Hələ yolum düşməyib, bir tumurcuq 
  kədərəm 
  Hələ yana bilərəm, bir şam işıq qədərəm.
  Hələ yaydan ox kimi təzəcə çıxmışam ki,
  Hələ ildırım kimi təzəcə çaxmışam ki,
  Fürsət ver ki, bir anlıq qayalarda qamaşım
  Hələ səndən uzağam, incimə, qəbir daşım.

                                                                BƏRƏLTMƏ

  Bərəltmə, sən Allah, gözlərini bərəltmə!
  Sən allah haray-həşir qopartma.
  Səsini "heyif" kəlməsinə
  Yükləyib boğazından aparma.
  Sus, bax.
  Bir də bax.
  Yadında saxla.
  Yaddaşına yaz gözlərində nə var,
  Mənəm də, ölü olanda nə olar!

                                                   SALAM, MAVİ DƏNİZ

  Salam, mavi dəniz, görüşdük yenə.
  Bəlkə də son dəfə, nə bilmək olar.
  Dalğalar qırışmı mavi üzünə?
  Bəlkə də, nə bilim, bənzətmək olar.

  Salam, mavi dəniz! O sahil uzaq.
  Bu sahil qumunda doyunca gəzim.
  Məndənmi dünyada bir iz qalacaq?
  Qoy ki, gözlərimi yumunca gəzim.

  Salam, mavi dəniz! Sən də "salam" de.
  Söhbətə əvvəldi "salam" , əzizim.
  Qəvvasa salam de, hələ sağam de
  Mehriban dənizim, mavi dənizim.

                                                           SOZALIR

  Sozalıralnımın qırış qatında
  Ötən ömürlərin harayı, ahı.
  Dünyanın bugünkü tərs ovqatında
  Ruhumun görəsən nəydi günahı?

  İlkin günlərimdən son günlərimə
  Tarıma çəkilən sinirli siməm.
  Dünyanı qaldırıb çiyinlərim
  Kainatı gəzən bağlı tilsiməm.
  Sozalır alnımın qırış qatında
  Axtarıb gəldiyim son nəticələr.
  Dünyanın bu günkü tərs ovqatında
  Ulduzlar yenə də yanır gecələr.

                                                       ALÇA ÇİÇƏYİ

  O qızın saçına yaraşıq üçün
  Puç edib açılmış diləklərini.
  Sənin yadındamı, alça çiçəyi,
  Yığardım ovcuma ləçəklərini.

  Bir sevgi xətrinə vüsal yelində
  Doğranıb beləcə hey sovrulardın.
  Mənim ürəyimdən sevinc qopardı
  Sənsə göy üzünə durub baxardın.

  Mən ki, xoşbəxt idim məhəbətimlə
  O məni unutdu, alça çiçəyi.
  Mən yəqin bilirəm, mənim sevgimi
  Sənin ahın tutdu, alça çiçəyi.

                                                               ÖZÜN DE

  Əgər sevməsəydim illərdən bəri
  Arxanca yolları yorardımmı mən?
  Sənin haqqındakı son xəbərləri
  Qəşəng rəfiqəndən sorardımmı mən?

  Əyər sevməsəydim, sənə dünənki
  İmzasız məktubu yollardımmı mən?
  Həsrət baxışımı de çiynindəki
  Güllü örpəyindən salardımmı mən?

  Əyər sevməsəydim, düşün bir anlıq
  Çaylar da tərsinə axardı onda.
  Məşhər alovuna düşüb yanardıq
  Dünya məhvərindən çıxardı onda.

  Əyər sevməsəydim üzüldüm, Allah!
  Sevgi ol; ovcuma, gözlərimə yağ.
  Mən səni sevirəm, bir səni vallah,
  Əyər inanmırsan, gözlərimə bax.