Baş həkim və arvadı qəzada həlak oldu

Onların avtomobili «TIR»-ın altında qalıb
Bakıda və Beyləqanda ölümlə nəticlənən yol qəzaları baş verdi
Xətai rayonu ərazisi Nobel prospektində iki “VAZ-2107” markalı avtomobil toqquşub. Daxili İşlər Nazirliyinin mətbuat xidmətinin yaydığı məlumata görə, avtomobillərdən biri Cəfərov Vüqar Həsən oğluna məxsus, digərinin sürücüsü isə hələlik dəqiqləşdirilməyib.
 Sürücü Vüqar Cəfərov qəzanın Suraxanı rayonundan şəhər istiqamətində hərəkət edərkən baş verdiyini deyib: “Mən Naxçıvanski tərəfdən gəlirdim. Gördüm ki, arxadan qara “2107” gah sağa, gah da sola hərəkət edərək sürətlə gəlir. Mənim maşınıma çırpıldı, nəticədə mənim avtomobilim bardyorun üstünə çıxdı”.
Vüqar Cəfərov Avtomobildən düşən cavanların onu danışığa çağırdığını, daha sonra öz avtomilləri ilə ərazidən uzaqlaşdıqlarını deyib: “Qabaqda saxladılar. Cavan uşaqlar idi. Dedi, dayı, gəl çəkək kənara həll edək. Daha sonra gördüm maşına oturub aradan çıxdılar”.
Qəza zamanı sürücü Vüqar Cəfərov xəsarət almasa da ona məxsus avtomobilə ciddi ziyan dəyib. Hadisənin səbəbləri Xətai rayon DYPŞ-nin müfəttişləri tərəfindən araşdırılır.
Şirvan xəstəxanasının baş həkimi və onun həyat yoldaşı avtomobil qəzasında ölüb. DYP-dən verilən məlumata görə, dünən Bakı-Qazax yolunun Hacıqabul rayonunun Qızılburun ərazisində Şirvan şəhər xəstəxanasının baş həkimi Murad Salmanov idarə etdiyi “Hyundai” markalı avtomobillə TİR yük avtomobili toqquşub.
Nəticədə baş həkim, 1965-ci il təvəllüdlü Murad Salmanov və həyat yoldaşı, 1965-ci il təvəllüdlü Kəmalə Salmanova hadisə yerində keçiniblər.
Beyləqan rayonunun Daşburun qəsəbəsində ölümlə nəticələnən yol-nəqliyyat hadisəsi baş verib. “Ford” markalı mikroavtobusla yük maşınının toqquşması nəticəsində bir nəfər ölüb, üç nəfər yaralanıb.
Hadisə Beyləqan rayonu ərazisindən keçən Hacıqabul-Bəhramtəpə-Mincivan yolunun 139-cu kilometrliyində qeydə alınıb. Hümbət Alışovun idarə etdiyi “Ford” markalı sərnişindaşıma avtobusu ilə əks istiqamətdə hərəkətdə olan Elşən Quliyevin darə etdiyi yük avtomobilinin toqquşması nəticəsində mikroavtobusun sərnişini Əliyeva Almaz Fərhad qızı hadisə yerində keçinib. Digər sərnişinlər Məmmədov Valeh Xaləddin oğlu, Əzimov Ramil Sərhad oğlu və yük avtomobilinin sürücüsü müxtəlif dərəcəli bədən xəsarətləri alaraq Beyləqan Mərkəzi Rayon Xəstəxanasının travmatologiya şöbəsinə yerləşdiriliblər.

"Bizim yol"